EVENTS

Event : ലൈബ്രറി കൗണ്‍സില്‍ ഗ്രന്ഥശാലകള്‍ക്കുള്ള പുരസ്‌കാരങ്ങള്‍ പ്രഖ്യാപിച്ചു. ഇ.എം.എസ്. പുരസ്‌കാരം എടത്തല വള്ളത്തോള്‍ സ്മാരക വായനശാലക്ക്
Date :2018-03-24 - 2018-05-24
Description : സംസ്ഥാന ലൈബ്രറി കൗണ്‍സില്‍ ഗ്രന്ഥശാലകള്‍ക്കുള്ള 2016-17 വര്‍ഷത്തെ വിവിധ പുരസ്‌കാരങ്ങള്‍ പ്രഖ്യാപിച്ചു. സംസ്ഥാനത്തെ അമ്പത് വര്‍ഷം പിന്നിട്ട ഏറ്റവും മികച്ച ഗ്രന്ഥശാലക്കുള്ള ഇ.എം.എസ്. പുരസ്‌കാരത്തിന് എറണാകുളം വള്ളത്തോള്‍ സ്മാരക വായനശാല, എടത്തല അര്‍ഹരായി. 50,000/-രൂപയും വെങ്കല ശില്‍പവും പ്രശസ്തി പത്രവുമടങ്ങുന്നതാണ് പുരസ്‌കാരം. മികച്ച ഗ്രാമീണ ഗ്രന്ഥശാലക്കുള്ള ഡി.സി. പുരസ്‌കാരത്തിന് കൊല്ലം ചാണപ്പാറ സന്‍മാര്‍ഗദായിനി സ്മാരക വായനശാല അര്‍ഹരായി. 50,000/- രൂപ മുഖവിലയുള്ള പുസ്തകങ്ങളും പ്രശസ്തി പത്രവുമടങ്ങുന്നതാണ് ഡി.സി. ബുക്‌സ് ഏര്‍പ്പെടുത്തിയ പുരസ്‌കാരം. പിന്നോക്ക പ്രദേശത്ത് മികച്ച പ്രവര്‍ത്തനം നടത്തുന്ന ഗ്രന്ഥശാലക്കുള്ള എന്‍. ഇ. ബാലറാം പുരസ്‌കാരം കോട്ടയം ബി.എസ്.എസ്. നെഹ്‌റു മെമ്മോറിയല്‍ ലൈബ്രറി, പട്ട്യാലിമറ്റം കരസ്ഥമാക്കി. 15,000/- രൂപ മുഖവിലയുള്ള പുസ്തകങ്ങളും പ്രശസ്തി പത്രവുമടങ്ങുന്നതാണ് കോഴിക്കോട് പൂര്‍ണ പബ്ലിക്കേഷന്‍സ് ഏര്‍പ്പെടുത്തിയ പുരസ്‌കാരം.സാമൂഹിക സാംസ്‌കാരിക രംഗത്തെ പ്രവര്‍ത്തനത്തിനുള്ള സമാധാനം പരമേശ്വരന്‍ പുരസ്‌കാരം പാലക്കാട് പള്ളം സ്മാരക വായനശാല കരസ്ഥമാക്കി. 9999/- രൂപയും പ്രശസ്തി പത്രവുമടങ്ങുന്നതാണ് എറണാകുളം സി.ഐ.സി.സി ബുക്‌സ് ഏര്‍പ്പെടുത്തിയ പുരസ്‌കാരം. മികച്ച ബാലവേദി കേന്ദ്രത്തിനുള്ള പി. രവീന്ദ്രന്‍ പുരസ്‌കാരത്തിന് പാലക്കാട് ജില്ലാ പബ്ലിക്ക് ലൈബ്രറി അര്‍ഹരായി. 20,000/- രൂപ മുഖവിലയുള്ള പുസ്തകങ്ങളും പ്രശസ്തി പത്രവുമടങ്ങുന്നതാണ് പ്രഭാത് ബുക്ക് ഹൗസ് ഏര്‍പ്പെടുത്തിയ പുരസ്‌കാരം. മികച്ച പരിസ്ഥിതി, ശാസ്ത്ര അവബോധന പ്രവര്‍ത്തനള്‍ക്കുള്ള സി.ജി. ശാന്തകുമാര്‍ പുരസ്‌കാരം കാസര്‍ഗോഡ് നവോദയ വായനശാല & ഗ്രന്ഥാലയം കരസ്ഥമാക്കി. ഗ്രീന്‍ ബുക്‌സ് ഏര്‍പ്പെടുത്തിയ 25,000/- രൂപ മുഖവിലയുള്ള പുസ്തകങ്ങളും പ്രശസ്തി പത്രവുമടങ്ങുന്നതാണ് പുരസ്‌കാരം. ഏപ്രില്‍ മാസം ഇ.എം.എസ്. പുരസ്‌കാരത്തിന് അര്‍ഹത നേടിയ വള്ളത്തോള്‍ സ്മാരക വായനശാലയുടെ ആഭിമുഖ്യത്തില്‍ പുരസ്‌കാര സമര്‍പ്പണം നടത്തുന്നതാണെന്ന് സ്റ്റേറ്റ് ലൈബ്രറി കൗണ്‍സില്‍ പ്രസിഡന്റ് ഡോ. കെ.വി. കുഞ്ഞികൃഷ്ണന്‍, സെക്രട്ടറി അഡ്വ. പി. അപ്പുക്കുട്ടന്‍, പുരസ്‌കാര നിര്‍ണയസമിതി കണ്‍വീനര്‍ കീഴാറ്റൂര്‍ അനിയന്‍ എന്നിവര്‍ അറിയിച്ചു.
Event : വായനപക്ഷാചരണം -സംസ്ഥാനതല ഉല്‍ഘാടനം മുഖ്യമന്ത്രി നിര്‍വഹിച്ചു
Date :2018-06-21 - 2018-08-21
Description : കേരള സര്‍ക്കാരും കേരള സ്റ്റേറ്റ് ലൈബ്രറി കൗണ്‍സിലും സംയുക്തമായി സംഘടിപ്പിച്ച വായനപക്ഷാചരണത്തിന്റെ സംസ്ഥാനതല ഉല്‍ഘാടനം മുഖ്യമന്ത്രി ശ്രീ.പിണറായി വിജയന്‍ നിര്‍വഹിച്ചു. ശ്രീ. കെ. മുരളീധരന്‍ എം.എല്‍.എ. അധ്യക്ഷനായിരുന്നു. ജില്ലാ പഞ്ചായത്ത് പ്രസിഡന്റ് വി. കെ. മധു സ്‌കൂള്‍ മാഗസിന്‍ ഏറ്റുവാങ്ങി. സ്‌കൂള്‍ ലൈബ്രറിക്കുള്ള പുസ്തക സമര്‍പ്പണം സ്റ്റേറ്റ് ലൈബ്രറി കൗണ്‍സില്‍ പ്രസിഡന്റ് ഡോ. കെ. വി. കുഞ്ഞികൃഷ്ണന്‍ നിര്‍വഹിച്ചു. സ്റ്റേറ്റ് ലൈബ്രറി കൗണ്‍സില്‍ സെക്രട്ടറി അഡ്വ. പി. അപ്പുക്കുട്ടന്‍, എന്‍. ബാലഗോപാല്‍ (പി.എന്‍. പണിക്കര്‍ ഫൗണ്ടേഷന്‍), ജില്ല ലൈബ്രറി കൗണ്‍സില്‍ സെക്രട്ടറി പി. കെ. രാജ്‌മോഹന്‍, നഗരസഭ കൗണ്‍സിലര്‍ രമ്യ രമേഷ്, സ്‌കൂള്‍ പ്രിന്‍സിപ്പല്‍ എന്‍. രത്‌നകുമാര്‍, ഹെഡ്മാസ്റ്റര്‍ രവീന്ദ്ജി, പി.ടി.എ. പ്രസിഡന്റ് രാജീവ് വെഞ്ഞാറമൂട്, സ്റ്റേറ്റ് ലൈബ്രറി കൗണ്‍സില്‍ ജോ.സെക്രട്ടറി എന്‍.എസ്. വിനോദ് എന്നിവര്‍ സംസാരിച്ചു. പി.എന്‍. പണിക്കരുടെ ചരമദിനമായ ജൂണ്‍ 19 മുതല്‍ ഐ.വി. ദാസിന്റെ ജന്മദിനമായ ജൂലൈ 7 വരെയാണ് വായനപക്ഷാചരണം നടക്കുന്നത്. പട്ടം ഗവ. മോഡല്‍ എച്ച്. എസ്. ഫോര്‍ ഗേള്‍സിലാണ് ചടങ്ങ് സംഘടിപ്പിച്ചത്.
Download : Attachment 1   Attachment 2   Attachment 3   Attachment 4  
Event : അഖിലകേരള വായനോല്‍സവം 2018 ന്റെ പുസ്തകങ്ങള്‍ പ്രഖ്യാപിച്ചു
Date :2018-04-07 - 2018-06-07
Description : കേരള സ്റ്റേറ്റ് ലൈബ്രറി കൗണ്‍സില്‍ സംസ്ഥാനത്തെ ഹൈസ്‌കൂള്‍, ഹയര്‍സെക്കന്ററി, കോളെജ് വിദ്യാര്‍ത്ഥികളെ പങ്കെടുപ്പിച്ച് നടത്തിവരുന്ന വായനോല്‍സവത്തിന്റെ പുസ്തകങ്ങള്‍ പ്രഖ്യാപിച്ചു. സ്‌കൂള്‍തലം, താലൂക്ക്തലം, ജില്ലാതലം, സംസ്ഥാനതലം എന്നീ നാല് ഘട്ടങ്ങളിലായാണ് ഹൈസ്‌കൂള്‍തല മല്‍സരം നടത്തുന്നത്. ഹയര്‍സെക്കന്ററി വിഭാഗത്തിന് താലൂക്ക്, ജില്ല, സംസ്ഥാനതലങ്ങളില്‍ മല്‍സരം നടക്കും. കോളെജ് വിഭാഗത്തിന് ജില്ല, സംസ്ഥാനതല മല്‍സരങ്ങളാവും നടക്കുക. ഹൈസ്‌കൂള്‍, ഹയര്‍സെക്കന്ററി, കോളെജ് വിഭാഗത്തിലെ മല്‍സരങ്ങള്‍ക്കായി തെരഞ്ഞെടുത്ത പുസ്തകങ്ങളുടെ വിവരം ചുവടെ ചേര്‍ക്കുന്നു.
Download : Attachment 1   Attachment 2